منتخب اشعار

عزیز نبیل كے منتخب اشعار
------------------------------------------

جس طرف چاہوں پہنچ جاؤں مسافت کیسی

میں تو آواز ہوں، آواز کی ہجرت کیسی

۔۔۔۔۔۔۔۔۔۔۔۔۔

عادتا سلجھا رہا تھا گتّھیاں کل رات مَیں

دل پریشاں تھا بہت اور مسئلہ کوئی نہ تھا

۔۔۔۔۔۔۔۔۔۔۔۔۔

نہ جانے کس کے قدم چومنے کی حسرت میں

تمام راستے دل کی طرح دھڑک رہے تھے

۔۔۔۔۔۔۔۔۔۔۔۔۔

سوال تھا کہ جستجو عظیم ہے کہ آرزو

سو یوں ہوا کہ عمر بھر جواب لکھ رہے تھے ہم

۔۔۔۔۔۔۔۔۔۔۔۔۔

بہکا تو بہت بہکا، سنبھلا تو ولی ٹھہرا

اس چاک گریباں کا ہر رنگ نرالا تھا

۔۔۔۔۔۔۔۔۔۔۔۔۔

قلم ہے ہاتھ میں کردار بھی مرے بس میں

اگر میں چاہوں کہانی بدل بھی سکتا ہوں

۔۔۔۔۔۔۔۔۔۔۔۔۔

یہ دریا کچھ زیادہ ہنس رہا ہے

اسے صحرا کی جانب موڑ دوں کیا

۔۔۔۔۔۔۔۔۔۔۔۔۔

وہ شہرِ حیرت کا شاہزادہ گرفتِ ادراک میں نہیں ہے

اس ایک چہرے کی حیرتوں میں ہزار آنکھیں سما چکی ہیں

۔۔۔۔۔۔۔۔۔۔۔۔۔

تمام شہر کو تاریکیوں سے شکوہ ہے

مگر چراغ کی بیعت سے خوف آتا ہے

۔۔۔۔۔۔۔۔۔۔۔۔۔

شامِ غم میں نے جو پوچھا مرا غم خوار ہے کون

اک غزل میر کے دیوان سے باہر آئی

۔۔۔۔۔۔۔۔۔۔۔۔۔

خامشی ٹوٹے گی آواز کا پتّھر بھی تو ہو

جس قدر شور ہے اندر کبھی باہر بھی تو ہو

۔۔۔۔۔۔۔۔۔۔۔۔۔

سرائے درد میں بیٹھے ہوئے ہیں دل والے

بس ایک آخری تہمت کے انتظار میں ہیں

۔۔۔۔۔۔۔۔۔۔۔۔۔

ہم قافلے سے بچھڑے ہوئے ہیں مگر نبیل

اک راستہ الگ سے نکالے ہوئے تو ہیں

۔۔۔۔۔۔۔۔۔۔۔۔۔

مرا طریقہ ذرا مختلف ہے سورج سے

جہاں پہ ڈوبا وہیں سے ابھرنے والا ہوں

۔۔۔۔۔۔۔۔۔۔۔۔۔

میں دیکھ سکتا ہوں خوابوں کے آر پار نبیل

کسی نے باندھ رکھی ہے مری نظر پھر بھی

۔۔۔۔۔۔۔۔۔۔۔۔۔

یہ کون بلانے لگا مجھ کو مری جانب

یہ کون سرِ شام اترنے لگا مجھ میں

۔۔۔۔۔۔۔۔۔۔۔۔۔

کبھی تو چمکے گی صبحوں کی رہ گزار نبیل

اداس رات کی مٹّھی میں خواب رکھّیں گے

۔۔۔۔۔۔۔۔۔۔۔۔۔

میں ایک لمحہ تھا اور نیند کے حصار میں تھا

پھر ایک روز کسی خواب نے جگا یا مجھے

۔۔۔۔۔۔۔۔۔۔۔۔۔

جانے کتنے سورجوں کا فیض حاصل ہے اسے

اس مکمّل روشنی سے جو ملا روشن ہوا

۔۔۔۔۔۔۔۔۔۔۔۔۔

نبیل ریت میں سکّے تلاش کرتے ہوئے

میں اپنی پوری جوانی گنوائے بیٹھا ہوں

۔۔۔۔۔۔۔۔۔۔۔۔۔

ہوش والوں سے کوئی کہہ دے کہ اپنے گھر کو جائیں

دشت میں آوارگی کرنے کے بھی آداب ہیں

۔۔۔۔۔۔۔۔۔۔۔۔۔

قید کرکے گھر کے اندر اپنی تنہائی کو میں

مسکراتا گنگناتا، گھر سے باہر آگیا

۔۔۔۔۔۔۔۔۔۔۔۔۔

اک تعارف تو ضروری ہے سرِ راہِ جنوں

دشت والے نئے برباد کو کب جانتے ہیں